Бишкек шаарындагы Жибек-Жолу проспектисинде жайгашкан көпүрөнүн түндүк тарабы ушул жуманын аягында пайдаланууга берилет. Бул тууралуу борбор калаанын мэриясы билдирди.

Жол кыймылын ачуу буга чейин эртерээк пландалган, бирок абанын кескин суукташы жана жаан-чачынга байланыштуу мөөнөт дем алыш күндөрүнө жылдырылды.

Муниципалитеттин маалыматына ылайык, реконструкциянын жүрүшүндө узундугу 25 метр болгон көпүрө кыйла кеңейтилип, бекемделди. Ачылгандан кийин транспорт кыймылы көпүрөнүн түндүк тарабы аркылуу уюштурулат.

Көпүрөнүн түштүк тарабын март айынын аягына чейин ачуу пландалууда. Учурда жол кызматтары жол катмарын реконструкциялоо иштерин улантууда.